Të dënuarit me burgim të përjetshëm apelojnë për trajtim njerëzor dhe më shumë liri

Të dënuarit me burgim të përjetshëm në burgun e Peqinit i kanë dërguar një kërkesë ministrit të drejtësisë Ulsi Manja, ku kërkohet ndryshimi i Kodit Penal, më konkretisht nenit 65 të tij. Letra i është drejtuar edhe presidentit Ilir Meta e kryeministrit Rama.

Neni në fjalë ndalon lirimin me kusht për të dënuarin me burgim të përjetshëm.

“Vetëm në raste të jashtëzakonshme i dënuari me burgim të përjetshëm mund të lirohet me kusht kur: Ka vuajtur jo më pak se njëzet e pesë vjet burgim dhe, gjatë vuajtjes së dënimit ka mbajtur sjellje shembullore dhe çmohet se i është arritur qëllimit të dënimit për edukimin e tij,” parashikohet nga ligji.

Të dënuarit e Peqinit kërkojnë heqjen e togfjalëshit “vetëm në raste të jashtëzakonshme”, si dhe të rishihet mundësia e lirimit të tyre me kusht kur kanë kryer 25 vite burgim.

Të dënuarit të cilët pritet të përshkallëzojnë qëndrimin e tyre dhe në grevë urie kërkojnë përafrimin e ligjit me atë evropian, ndërsa shprehen se punësimi si mjeti më i fuqishëm për riintegrimin dhe riedukimin mungon.

Kurset për gjuhë të huaja mungojnë, kurset për kompjuter, elektriçist, hidraulik, xhenerik, saldator dhe profesionet e ndryshme mungojnë, pretendohet në letrën e tyre. Sipas tyre ata janë të privuar nga shkollimi dhe të gjitha aktivitetet, përveçse një herë në 2 javë aktivitetit sportiv të futbollit, dhe një herë në javë mësimit të fesë.

Pakënaqësi ka dhe në ofrimin e së njëjtit ushqim në këtë burg për 365 ditë të vitit.

“Nga ana shëndetësore ofrimi i të njëjtës gjellë, patate në drekë për 365 ditë të vitit dhe fasule në darkë për 365 ditë të vitit, është vetëvrasëse për shëndetin e të dënuarit me burgim të përjetshëm, të cilit dita-ditës i bie imuniteti deri sa sëmuret e shkatërrohet plotësisht. Po ashtu edhe uji gëlqeror që pijmë nga rubineti ka shkaktuar e po shkakton dëme të konsiderueshme”, shkruhet në letër.