Përplasje në Kuvend për borxhin, Basha: Paratë shkojnë për një grup të vogël njerëzish

Kryetari i Partisë Demokratike, Lulzim Basha akuzoi qeverinë për një sërë borxhesh të marra në 8 vite. Në seancën plenare ku në fokus ishte akti normativ për ndryshime buxhetin e 2021, kryedemokrati deklaroi se paratë shkojnë për një grup njerëzish të lidhur me qeverinë.

“2 miliardë euro për 7 kontrata te reja me PPP, tregojnë qartë se prioritet vazhdojnë të kenë shpërdorimin e  parave shqiptare në shërbim të klientëve të tyre”, tha Basha nga foltorja e Kuvendit.

Për këtë, Basha zgjidhjen e shikon te vetingu në politikë.

“Një instrument që shërben për pastrimin e politikës dhe njëkohësisht krijon premisat e domosdoshme për rritjen e përgjegjshmërisë të politikanëve”, tha kryedemokrati.

Për të mbrojtur rishikimet në buxhetin e këtij viti dhe daljen në tregjet ndërkombëtar për eurobondin, kryeministri Rama përmendi shifra të tjera.

“E di sa e keni marrë ju eurobondin e fundit, me 12%. Ne në kohë pandemie kemi marrë me 3.5% eurobondin e fundit”, tha kreu i qeverisë.

Marrja e borxhit 700 milion euro u miratua me 74 vota pro dhe 49 kundër