Mblidhet Kuvendi në RMV, vendoset sot fati i qeverisë së Zoran Zaev

Kuvendi i Maqedonisë së Veriut është mbledhur në seancë plenare dhe shqyrton mocionin e mosbesimit ndaj qeverisë, të iniciuar nga opozita maqedonase dhe ajo shqiptare.

VMRO-DPMNE, koalicioni Aleanca për Shqiptarët dhe Alternativa, si dhe Lëvizja Besa, thonë se kanë siguruar 61 vota nga 120 deputet që ka Kuvendi i Maqedonisë së Veriut.

Vendimi për mocion erdhi pasi Zaev u tërhoq nga dorëheqja e paralajmëruar më 31 tetor, pas humbjes së zgjedhjeve lokale.

Sipas Kushtetutës, votëbesimi ndaj qeverisë duhet të përfundojë në të njëjtën ditë. Nëse opozita siguron 61 vota kundër kabinetit Zaev, atëherë qeveria është e detyruar të japë dorëheqje brenda 24 orëve.

Pas këtij momenti Presidenti ka 10 dite kohe te mandatojë për formimin e qeverisë së re partitë që do të konfirmojë se kanë të paktën 61 deputetë në Kuvendin e Maqedonisë së Veriut.

Nga ana tjetër, nëse opozita nuk arrin të rrëzojë qeverinë, atëherë në 90 ditët e ardhshme nuk do të mund të paraqesë mocion të ri mosbesimi ndaj qeverisë, nëse së paku 61 deputetë nuk paraqesin iniciativë.

LEXONI GJITHASHTU:

• Më 14 nëntor zgjedhjet e treta në Bullgari, zgjidhet edhe presidenti