Vetingu i politikanëve, Basha: Një orë e më parë, shkëput Shqipërinë nga kthetrat e korrupsionit

Kryetari i PD-së, Lulzim Basha këmbëngul në nismën e depozituar tashmë në Kuvend për vetingun në politikë, pasi sipas tij, kjo e shkëput Shqipërinë nga kthetrat e korrupsionit, duke ndëshkuar politikanët e korruptuar dhe duke kthyer pushtetin tek qytetarët.

Përmes një postimi në Twitter, kreu i PD shprehet se vetingu është një domosdoshmëri për t’i dhënë fund pandëshkueshmërisë së politikanëve.

“Që pushteti t’u kthehet qytetarëve, duhet të marrë fund pandëshkueshmëria e politikanëve të korruptuar, duhet pastruar politika nga abuzuesit që janë pasuruar në kurriz të qytetarëve, duhet një orë e më parë”, shkruan Basha në Twitter.

Disa ditë më parë pas takimit që zhvilloi me disa kongresmenë amerikanë kreu i PD tha se kishte marrë garancinë e SHBA për vetingun e politikanëve.

“Nuk do t’i ndahemi asnjë çast kauzës kryesore të shqiptarëve që është të kenë politikanë të pastër, që u shërbejnë interesave të qytetarëve dhe jo një grushti të ngushtë të krimit të organizuar dhe oligarkëve”, deklaroi Basha.