77 vite nga Çlirimi i Tiranës, Kapri: Masakra e ‘Hotel Bristol’, krimi më i rëndë i partizanëve

Nëntori është muaji i festave, festave të çlirimit dhe të pavarësisë së vendit. 17 Nëntori 1944 në kalendarin e historisë së vendit shënon çlirimin e Tiranës.

Historiani Erald Kapri shprehet se ende kjo ditë historike mësohet vetëm nga perspektiva e komunistëve që erdhën në pushtet në atë kohë.

Gjatë një interviste për Euronews Albania, ai tha se gjatë çlirimit, partizanët u ndihmuan nga britanikët përmes bombardimeve.

Gjithashtu, Kapri foli edhe për krimet e partizanëve për të cilat ende flitet shumë pak.

“Pas çlirimit, Beteja e Tiranës u bë një mit nga propaganda e komunistëve. Nga datat 28 tetor deri para çlirimit janë vrarë me dhjetëra persona. Sot dihet me afërsi 40 veta të pushkatuar pa gjyq në pragun e shtëpisë”, tha ai.

Historiani përmendi “Masakrën e Hotel Bristolit” si një nga ngjarjet më të rënda.

“Në bodrumin e tij u gjetën 14 kufoma intelektualësh në mëngjes e 17 nëntorit. Mes tyre ishin dy vëllezërit e Musine Kokalarit, gazetari Nebil Çika, që në atë kohë ishte gazetar i “Reuters” dhe më i famshmi në vitet 30-40. Komunistët nuk mbajnë kurrë përgjegjësi për to”, tha Kapri.

Ai solli në vëmendje dëshmi të oficerëve britanikë të cilët raportonin se komunistët kishin arrestuar të paktën 2 mijë shqiptarë ende pa u çliruar vendi.

Gjithashtu Kapri tha se janë publikuar telegrame ku Enver Hoxha urdhëronte krijimin e burgjeve të përkohshme për të arrestuar çdo armik të mundshëm.

Sipas historianit për çlirimin e Tiranës duhet të tregohemi të kujdesshëm dhe të tregohen të dy anët e medaljes.

“Në librat e historisë vazhdon ende përdorimi i terminologjisë së krijuar gjatë diktaturës. Në ditët e sotme nxënës të gjimnazeve apo edhe studentë e artikulojnë historinë si një skenar të një filmi të ‘Kinostudios’”, tha ai.