Hapet ekspozita në Prishtinë në kujtim të mbi 1600 të pagjeturve në Kosovë

“Më i mirë ish varri, sesa mos me ditë”, kjo është ekspozita që u hap dje në Prishtinë në kujtim të mbi 1600 të pagjeturve në Kosovë.

Këta gurë simbolizojnë varret, e të pagjeturve, ndërsa këto orë digjitale tregojnë kohën që kur mbi 1600 persona, emrat e të cilëve janë ngjitur në mur, u zhduken e fati i tyre nuk dihet ende as pas 21 vjeteve.

Ekspozita u çel nga Driton Selmani me kuratore Blerta Hoçia.

Vetë autori Selmani tregoi qëllimin që ka pasur kjo ekspozitë që nga ideja e deri te finalizimi.

“Ekspozita ka shumë shtresa të kompleksititeti të sjelljes njerëzore. Është një perde e hapur mbi plagën që po djeg shumë zemra, shumë shpirtra”, u shpreh Selmani.

Ndërsa, Dardan Hoti, koordinator i projekteve hulumtuese në Fondin për të Drejtën Humanitare, tregoi se përveç ekspozitës janë duke realizuar edhe një hulumtim përmes, të cilit do të mundohen të hedhin sa më shumë drita rreth procesit për gjetjen e të zhdukurve dhe fatin e tyre.

Titulli i ekspozitës është një fragment nga biseda me Kumrije Jahmurataj, një nga familjarët e shumtë që presin zbardhjen e fatit për më të dashurit e tyre.

Ajo do qëndrojë e hapur deri me 31 janar të vitit të ardhshëm.

LEXONI GJITHASHTU:

• Senati amerikan konfirmon Hovenier si ambasador në Kosovë