Vjosa Osmani merr mbështetjen e kryeministrit kanadez për procesin e njohjeve

Presidentja e Kosovës, Vjosa Osmani është pritur në një takim nga kryeministri i Kanadasë, Justin Trudeau nga i cili ka marrë mbështetje për procesin e njohjeve të Kosovës si shtet i pavarur. Osmani e ka vlerësuar takimin si një rikonfirmim të përkrahjes së Kanadasë për Kosovën.

“Fuqizimi i subjektivitetit ndërkombëtar të Kosovës nëpërmjet rritjes së njohjeve e anëtarësimeve në organizata ndërkombëtare, bashkëpunimi në fushën e mbrojtjes, tregtisë e arsimit, si dhe fuqizimi i grave, i demokracisë dhe i sundimit të ligjit, ishin vetëm disa nga temat që diskutuam e për të cilat do të punojmë bashkë”, shprehet Osmani.

Nga ana e tij kryeministri Justin Trudeau, përmes një postimi në Twitter ka shkruar se ka biseduar me Osmanin për mënyrën se si Kosova dhe Kanadaja do të mund të avancojnë vlerat e përbashkëta.

“I lumtur që u takuam sot me Presidenten e Kosovës, Vjosa Osmani, për të biseduar për mënyrën se si Kanadaja dhe Kosova mund të avancojnë vlerat e përbashkëta, qofshin ato për të promovuar demokracinë, për të mbështetur barazinë gjinore, për të ndërmarrë veprime klimatike, apo për të mbrojtur të drejtat e njeriut. Le të vazhdojmë të bëjmë përparim së bashku”, ka shkruar kryeministri kanadez.

Glad we could meet today, @VjosaOsmaniPRKS, and speak about how Canada and Kosovo can advance our shared values. Whether it’s to promote democracy, support gender equality, take climate action, or protect human rights, let’s keep making progress together. https://t.co/WFDhJt2604 pic.twitter.com/LU5imtP86o

— Justin Trudeau (@JustinTrudeau) November 24, 2021