Kryeministri Rama thirrje të re bizneseve që janë lejuar të punojnë

Kryeministri i vendit, Edi Rama, ka rikujtuar bizneset që janë lejuar të punojnë se duhet të mbajnë në subjektet e tyre vërtetimet përkatëse nga portali “e-Albania” dhe protokollet e tyre të sigurisë. Me një shënim në faqen e tij zyrtare, shefi i ekzekutivit pohon se “Task-Forca” e ngritur për monitorimin e situatës nga COVID-19 do të kontrollojë subjektet për të parë zbatimin e masave të diktuara.

Sipas tij, çdo subjekt që do të kapet në shkelje do të penalizohet në bazë të parashikimeve të aktit normativ dhe Kodit Penal.

“Çdo biznes i lejuar për hapje duhet të disponojë në mjedisin përkatës vërtetimin nga www.e-albania.al dhe protokollin përkatës të sigurisë, duke filluar nga e hëna 27 prill! Task-Forca ndërinstitucionale anticovid-19 do të inspektojë dhe sanksionojë, në bazë të aktit normativ dhe të kodit penal çdo biznes që nuk do të ketë dokumentacionin përkatës, si edhe kushtet e përcaktuara nga protokolli”, shkruan Rama.

Qeveria shqiptare i ka propozuar Kuvendit të Republikës së Shqipërisë që të zgjasë deri në 23 qershor gjendjen e fatkeqësisë natyrore në lidhje me pandeminë globale të COVID-19.