Juristi Manjani dhe aktivistja Ballauri analizojnë pse krimi i vjedhjes dominon në vend

Ylli Manjani tha në emisionin “Barometri” se krimet në Shqipëri, përqindja më e madhe e të cilëve janë vjedhje, vijnë si pasojë e problemit ekonomik në vend.

Sipas juristit, kjo gjë reflekton një shoqëri që jeton në një informalitet shumë të lartë.

“Krimi më i madh në thelb është krimi ndaj pasurisë së tjetrit. Në qoftë se s’ta vjedh dot, ta dëmtoj”, u shpreh Manjani.

Ylli Manjani tha se vrasjet marrin shumë vëmendje kur ndodhin, por harrohen shpejt, ndërsa vjedhja mbetet një problem i përhershëm.

“Shoqëria jonë është shoqëri parazitë, jeton me djersën e tjetrit”, u shpreh Manjani.

Aktivistja për të drejtat e njeriut, Elsa Ballauri tha nga ana tjetër se vjedhja nuk është vetëm problem ekonomik, por edhe shoqëror.

Gjatë kohës së komunizmit, argumentoi ajo, krimet më të dënuara ishin ato politike, ndaj shqiptarët e kanë të ngulitur në pavetëdije se “s’është ndonjë gjë e madhe të vjedhësh”.

Znj. Ballauri tha se vjedhjet duhen raportuar pasi edhe pse sendet e vjedhura mund të mos gjenden, një rast i caktuar do të bëhet çështje në komunitet, gjë që do të çojë drejt ndërgjegjësimit.

LEXONI GJITHASHTU:

• Vjedhja dhe dëmtimi i pronës, krimet që vuajnë më shumë qytetarët shqiptarë