Masa të reja anti-COVID në Kosovë, Kurti: Mjeti më efikas mbetet vaksinimi masiv

Ministri i Shëndetësisë në Kosovë, Rifat Latifi dhe kryeministri Albin Kurti prezantuan masat e reja për të parandaluar përhapjen e COVID-19 në Kosovë.

Z. Latifi tha se nga sot rikthehet mundësia e vaksinimit edhe gjatë fundjavës si dhe në aeroportin e Kosovës.

Të gjithë personat që hyjnë në Kosovë duhet të kenë certifikatën e plotë e në rast se personi ka vetëm një vaksinë, do të kërkohen testet. Nga 3 janari për të hyrë në Kosovë duhet të ketë vetëm certifikatën e plotë të vaksinimit.

Ministri Latifi tha se për të shmangur mbylljen e shkollave dhe bizneseve, punonjësve në institucione publike dhe private, udhëtarët e transportit publik, nxënësve, dhe studentëve, shfrytëzuesit e qendrave tregtare apo gastronomisë, do t’u kërkohet certifikata e plotë e vaksinimit apo e pjesshme. Kjo e fundit duke dëshmuar me testet.

Kryeministri Albin Kurti u shpreh se masat kundër pandemisë në Kosovë do të zbuten vetëm nëse rreziku nga virusi do të jetë më i ulët.

Kurti tha se mënyra më e mirë për të luftuar pandeminë është vetëm vaksinimi, ndërsa shtoi se këto masa janë të domosdoshme që situata epidemiologjike të mbahet nën kontroll.