Serbia hap një bllok kapitujsh në negociatat për anëtarësim në BE

Serbia hapi sot në Bruksel negociatat për një bllok kapitujsh, si pjesë e procesit të anëtarësimit të saj në Bashkimin Evropian.

Në konferencën ndërqeveritare është hapur blloku 4, që ka të bëjë me politikën e transportit, energjisë, rrjeteve trans-evropiane, mbrojtjen e mjedisit dhe ndryshimet klimatike.

Nga Serbia është kërkuar që të ketë rol konstruktiv edhe në dialogun me Kosovën dhe se kjo “do të përcaktojë edhe dinamiken e negociatave të anëtarësimit”.

Komisioneri i zgjerimit i Bashkimit Evropian Oliver Varhelyi hapjen e katër kapitujve në negociatat me Serbinë e quajti “sinjal të rëndësishëm jo vetëm për Serbinë por edhe për gjithë rajonin e Ballkanit Perëndimor”.

“Negociatat e anëtarësimit po përparojnë dhe BE-ja po i përgjigjet përparimit që bëjnë shtetet kandidate. Hapja e negociatave për këta kapituj, do të thotë se tash mund të fillojë puna e rëndësishme në këto fusha. Na pret punë shumë e madhe” tha Varhelyi.

Serbia në këtë konferencë është përfaqësuar nga Kryeministrja, Ana Bërnabiq. Ajo tha se vendi i saj pret së shpejti hapjen e kapitujve të tjerë. Ajo paralajmëroi investime të mëdha të Serbisë në fushën e ruajtjes së mjedisit, një prej temave të përfshira në kapitujt që u hapën më 14 dhjetor.

“Hapja e këtij grupi është jashtëzakonisht e rëndësishme për Serbinë, ky është grupi më i rëndësishëm nga të gjitha grupet. Ne duhet të vazhdojmë të punojmë me partnerët e BE-së për të përmbushur ngadalë standardet e Bashkimit në mënyrë që të mbyllim këta kapituj”, tha Bërnabiç.

Me hapjen e këtyre kapitujve Serbia tash ka të hapur, 22 nga 35 kapituj në procesin e negociatave me Bashkimin Evropian.