18 dhjetori, Basha kuvend te Pallati i Koncerteve, Berisha referendum në rrethe

Në 18 dhjetor demokratët do të jenë të ndarë. Një pjesë e tyre do të jenë në Pallatin e Koncerteve në Kuvendin e thirrur nga Lulzim Basha. Pjesa tjetër do të jenë në degët e rretheve për të marrë pjesë në referendumin e thirrur nga Sali Berisha.

Kuvendi do të nisë rreth orës 11:00. Aty do të vendoset për qëndrimin në vazhdim të partisë, por pritet të merret edhe një vendim për Berishën dhe mbështetësit e tij. Kuvendi do zgjasë rreth 5 orë dhe do marrin fjalën rreth 30 demokratë.

Një ditë pas Kuvendit, do të mblidhet Këshilli Kombëtar, ku do vendoset lidhur me organizimin e forumeve të PD dhe përfaqësimin në parlament të saj.

Nga ana tjetër, Berisha kërkon me referendum votat e 75 mijë demokratëve për shkarkimin e Bashës.

Është ngritur një komision që do të merret me organizimin e këtij referendumi i përbërë nga Albana Vokshi, Keltis Kruja, Edith Harxhi, Eno Bozdo dhe Ervin Minarolli.

Vendvotimet do jenë të ndryshme. Në disa qytete demokratët do shkojnë në selitë e degëve për të votuar, ndërsa në disa qytete të tjera janë zgjedhur godina publike.

Votimi i referendumit do zgjasë nga ora 8:00 e mëngjesit deri në 17:00.

Me një konflikt që vijon prej më shumë se 3 muaj, 2 logo, 2 vula dhe 2 organe drejtuese, demokratët duken më të përçarë se kurrë dhe gjasat më të mëdha janë që përplasja të përfundojë në Gjykatë.

LEXONI GJITHASHTU:

• Tension në PD, Berisha: Ka banda të armatosura në seli
• Berisha i kundërpërgjigjet SHBA-së: Po bëni bullizëm diplomatik
• Ish-ministri Imami: Basha dha urdhrin për 21 janarin, Berisha ishte në zyrë