Komisioni i Rithemelimit të PD: Basha të dorëzojë detyrën deri më 5 janar

Komisioni i Rithemelimit të PD deklaroi sot se nëse Lulzim Basha nuk lë zyrën dhe nuk dorëzon detyrën deri më datë 5 janar të 2022, atëherë anëtarësia do të kthehet në “përmbarues politik”.

“Refuzimi i vendimi të Kuvendit Kombëtar, si organi më i lartë statutor i Partisë Demokratike të Shqipërisë, si dhe refuzimi i vullnetit të 43385 anëtarëve të PDSH të cilët ratifikuan vendimin e shkarkimit tuaj, do të detyrojë anëtarësinë të shndërrohet në përmbaruesin politik të vendimit dhe vullnetit të saj”, thuhet në letrën e Komisionit të Rithemelimit.

Me datë 11 dhjetor, mbi 4000 delegatë të PD-së gjatë Kuvendit Kombëtar të thirrur nga Sali Berisha vendosen për shkarkimin e Lulzim Bashës nga posti i tij si kreu i PD-së. Me datë 18 dhjetor u zhvillua një referendum gjatë të cilit 43879 demokratë votuan për shkarkimin e Bashës. Në të njëjtën ditë, Lulzim Basha zhvilloi Kuvendin e PD-së, për të cilin ai thotë se është i vetmi Kuvend legjitim.