Besnik Aliaj: Ka një grup të tretë brenda PD që s’janë as me Berishën, as me Bashën

Ekziston një grupim i tretë brenda Partisë Demokratike që nuk është as me Sali Berishën dhe as me Lulzim Bashën. Kështu u shpreh në emisionin Mirmëngjes në Euronews Albania, anëtari i Këshillit Kombëtar të PD-së Besnik Aliaj.

Aliaj tha se brenda PD-ës ka nevojë për komunikim, e jo përplasje me gjuhë të ashpër.

“Më shumë se për debat, ka nevojë për komunikim, përplasja duhet të jetë përplasje idesh jo përplasje fizike. Unë e shoh me skepticizëm gjuhën e ashpër nga të dyja palët”, tha ai.

Besnik Aliaj tha se nga mënyra se si kanë rrjedhur ngjarjet, brenda PD-së do të ketë zgjedhje.

Përplasja midis Bashës dhe Berishës kanë nisur që në vitin 2017, pasi nuk ka pasur transparencë nga lidershipi i PD-së.

“Vendimet janë marrë në momentin e fundit, në mënyrë të heshtur, me takime të mbyllura me përfaqësuesit e maxhorancës”, tha ai, duke shtuar se Partia Demokratike “duhet të hapet, për të pritur figura të reja”.