Rikthehen regjistrat në shkolla pas denoncimeve në media

Shkollat 9-vjeçare dhe të mesme janë plotësuar me regjistra, 4 muaj pas nisjes së vitit shkollor.

Ka qenë presioni mediatik, që detyroi Ministrinë e Arsimit të shpërndajë regjistrat në shkolla.

Drejtori i Zyrës Vendore të Arsimit Parauniversitar në Korçë, Endri Pikuli ka pranuar se gjatë kësaj periudhe nuk ka pasur regjistra, por nënvizoi se prej 2 ditësh shkollat në këtë qark janë plotësuar me regjistra.

“Marrja e regjistrave manual do të thotë që çdo mësues ka përpara një regjistër. Prej dy ditësh kanë ardhur regjistrat nga klasa e 6-9 dhe sot që flasim bashkë, të gjitha klasat janë të plotësuara me regjistra”, u shpreh ai për emisionin “Mirëmëngjes” në Euronews Albania.

Z. Pikuli nënvizoi se regjistri është thjesht një çështje formale, pasi çdo mësues mban në regjistrin e tij personal vlerësimin e vazhduar të nxënësve dhe mungesat.

“Nuk ka asnjë penalitet, vonesa prej një periudhë e regjistrave. Është diskutuar për një regjistër online, pasi çdo prind do mund të sigurojë nëpërmjet portalit online vlerësimin për fëmijët e tij”, shtoi ai.

Ndërkohë, disa mësues kanë publikuar mesazhin që është shpërndarë nëpër shkolla për marrjen e regjistrave nga ana e mësuesve.

“Mësuesit e klasave kujdestari klasa 6-9 të tërheqin regjistrat në drejtori”, thuhet në mesazh.