Trafiku në Tiranë është reduktuar me 40%, thotë specialisti i Policisë Rrugore

Trafiku në Tiranë është reduktuar me 40%, pas ndalimit të betonierëve dhe kamionëve gjatë orëve të ditës. Kështu deklaroi për emisionin “Mirëmëngjes” në Euronews Albania specialisti i menaxhimit të trafikut urban në Policinë Rrugore, Gerhard Baka.

Ai nënvizoi se nga ora 7 deri në 9 të mëngjesit janë ndaluar edhe automjetet për transport të mallrave, për të shmangur trafikun në kryeqytet.

“Ka një përmirësim edhe në ndotjen e mjedisit, pasi mjetet e tonazhit të rëndë çlirojnë më shumë dioksid karboni sesa veturat”, tha z. Baka.

Ndërsa Shef i Sektorit të Qarkullimit në Policinë Bashkiake, Gentian Vocaj deklaroi se situata e trafikut në Tiranë tani është më e lehtësuar në krahasim me muajin dhjetor apo nëntor.

“Këto autorizime janë dhënë për firmat e ndërtimit, të cilat kanë leje për të ndërtuar në qytetin e Tiranës dhe për të gjithë betonierët apo kamioni që operojnë në këto ndërtime”, u shpreh ai, teksa sqaroi vendimin e fundit të Bashkisë Tiranë.