Banorët e “5 Majit” protestë para Kuvendit dhe Bashkisë

Mëngjesin e sotëm, banorët e “5 majit” në Tiranë po zhvillojnë një protestë para Kuvendit për shembjen e banesave të tyre.

Në mbështje të tyre janë edhe disa banorë të Laprakës, të cilët rrezikojnë që t’u shemben banesat e tyre nga një projekt rruge.

“Ne nuk jemi të paligjshëm”, “Kërkojmë të drejtën tonë”, këto janë disa nga pankartat që mbajnë në duar protestuesit.

Protestuesit kanë marshuar më tej drejt bashkisë, ku kanë kërkuar nga kryetari Erion Veliaj të takohet me ta në mënyrë që të gjendet një zgjidhje për problemin e tyre.

Pak javë më parë me vendim të qeverisë u shembën disa ndërtesa në zonën e ‘5 majit’ në Tiranë në kuadër të procesit të rindërtimit.

Vetëm disa nga banesat ishin të dëmtuara nga tërmeti. Një pjesë e banorëve nuk kanë pranuar që të negociojnë me qeverinë dhe nuk kanë firmosur asnjë marrëveshje. Ata sot nuk po marrin as pagesë qiraje dhe nuk kanë se ku të strehohen.

Këtë të enjte do mblidhet Kuvendi, për të diskutuar dhe miratuar disa projektligje të rëndësishme, siç është ai për noterin, për regjistrimin e pronarëve apo për profesionin e ndërmjetësit të pasurive të paluajtshme.

LEXONI GJITHASHTU:

• Familja me 5 anëtarë tek ‘5 Maji’ jeton mes gërmadhave