Rama i përgjigjet PD për udhëtimet me charter

Kryeministri Edi Rama i është përgjigjur Partisë Demokratike lidhur me akuzat për shpenzimet e udhëtimeve jashtë vendit.

Në një video të publikuar në rrjetet sociale Rama thotë se shifrat e publikuara nga PD për udhëtimet jashtë Shqipërisë janë joreale dhe se ai ka përdorur bileta ekonomike.

“Unë jam i pari kryeministër në këtë vend që udhëtimet e mia shumë të rralla private me familjen nuk i bëj kurrë me shpenzimet e shtetit…Kam përdorur ndenjëset ekonomike të Lufthanës së bashku me djalin dhe gruan time, që kanë kushtuar 345 euro”, shprehet Rama në një video të postuar në faqen e vet në Facebook ku i përgjigjet pyetjeve të PD lidhur me udhëtimin e fundit.

Disa ditë më parë, kreu i PD-së, Lulzim Basha akuzoi kryeministrin Edi Rama se po shfrytëzon postin për udhëtime nëpër botë me avion charter, me të cilin së fundmi ka harxhuar deri në 150 mijë euro karburant.

“Para dy ditësh shkoi dhe erdhi diku me charter dhe nuk njoftoi shqiptarët për çfarë po i harxhonte ato 120 apo 150  mijë euro karburant”, u shpreh Basha në Kuvend.

LEXONI GJITHASHTU: 

Basha: Rama lëviz me avion çarter, harxhon deri në 150 mijë euro karburant