Fronti më i ri i COVID, studentja shqiptare në Moskë: Lejohet të lëvizim vetëm 100 m nga banesa

Rusia konsiderohet fronti i ri i coronavirusit. Kjo, pasi numri i infektimeve dhe vdekjeve gjatë ditëve të fundit atje janë rritur ndjeshëm. Nga të dhënat e fundit të autoriteteve, rezulton se deri tani në Rusi numërohen mbi 155 mijë te infektuar, si dhe 1 400 te vdekur. 

Së fundmi i infektuar me COVID-19 rezultoi edhe kryeministri Mikhail Mishustin, i cili vetëm pak ditë më parë u izolua në banesë. Por, zëdhënësi i tij ka deklaruar se kreu i qeverisë është mirë dhe po merr mjekimet e duhura.

Blerina Mahmutaj, studente dhe gazetare shqiptare që jeton në Rusi, tregon për “Euronews Albania” se, autoritet lokale e shpjegojnë prekjen e Rusisë pas shumë javësh nga pandemia botërore me faktin se ndodhet larg Evropës.

“Autoritetet ruse e shpjegojnë duke theksuar ndoshta Rusia ndodhet edhe më larg Evropës dhe ka arritur që kohët e fundit të jetë vendi i fundit që ka filluar të infektohet më shumë. Masat Rusia ka filluar t’i marrë më vonë se Italia apo vende të tjera të Evropës”, deklaroi znj. Mahmutaj.

Sa u takon masave, autoritet nuk lejojnë që këmbësorët të dalin nga banesat më shumë se dy orë, ndërsa të gjithë rekomandohet që të përdorim maska dhe doreza.

“Të gjithë ata që punojnë duhet të pajisen me vërtetim se janë të regjistruar në sistemin e punësimit dhe nuk duhet të kalojnë më shumë se 100 metra larg zonës ku jetojnë’, përfundoi studentja shqiptare.