Banori i 5 Majit: Kontrata me bashkinë, një akt dhurimi i pronës

Banori i 5 Majit në Tiranë, Besnik Feta tregon se nuk ka firmosur kontratën me Bashkinë Tiranë për shembjen e banesës, pasi në të shkruhej se duhet t’i dhuronte këtij institucioni shtëpinë.

“Kontratën nuk e kam firmosur me bashkinë sepse është kontratë e njëanshme. Na thonë dhuroja pronën bashkisë. Kam 425 metra të banesës, bashkia më jep vetëm 130 metra dëmshpërblim. Është një akt dhurimi”, shprehet ai.

Z. Feta nënvizon se në kontratë nuk sqarohej as vendi ku do e marrin pronën e re dhe se kur.

Për këtë çështja, Avokatja e Popullit, Erinda Ballanca nënvizoi se kjo marrëveshje nuk përcakton afate  dhe as vendin e caktuar për pronën e re.

“Kur t’i bën kontratën për të përfituar sendin e ardhshëm, kjo kontratë është përpos vendimit të Këshillit të Ministrave. Kjo shkresë do iu shërbente qytetarëve për të qenë ata më të garantuar”, u shpreh ajo.

Avokatja e Popullit nënvizoi se  pagesa e qerasë nga bashkia është një vlerë shumë e vogël për të përfituar një banesë normale.

Ajo shprehur gatishmërinë e saj për t’u marrë me këto çështje dhe e ftoi z. Feta që t’i drejtohet Avokatit të Popullit.