Zgjerohen kërkimet për 10 të humburit në anijen e djegur në Korfuz

Kërkimet për 10 personat që ende rezultojnë të humbur nga djegia e anijes ‘Euroferry Olympia’ në brigjet e ishullit grek të Korfuzit, janë zgjeruar të hënën.

Anija me flamur italian vazhdon të digjet prej 4 ditësh. 281 persona mundën të shpëtoheshin ndërsa kërkimet brenda anijes 183 metra të gjatë vijojnë.

“Është një operacion shumë i vështirë për shkak të tymit të dendur dhe temperaturave shumë të larta”, tha për AFP një zëdhënës i departamentit të zjarrfikëses.

42 forca në terren dhe 2 helikopterë po marrin pjesë në kërkime për personat që ende rezultojnë të zhdukur.

Trupi i një 58-vjeçari grek u gjet të dielën, duke konfirmuar viktimën e parë nga djegia e anijes.

Euroferry Olympia u përfshi nga flakët të premten, 2 orë pasi la portin grek të Igumenicës.

Në momentin e zjarrit në bord ndodheshin 239 pasagjerë dhe 51 anëtarë të ekuipazhi.

LEXONI GJITHASHTU:

• Pasagjeri gjendet i gjallë pas 3 ditësh brenda anijes së djegur në Korfuz
• Pasagjerët e tragetit italian rrëfejnë orët e frikës nga zjarri