Sekuestro pasurisë 3,7 mln euroshe të dy vëllezërve nga Tirana, akuzohen për prostitucion e organizatë kriminale në Belgjikë

Gjykata ka vendosur sekuestro preventive ndaj pasurive të dy vëllezërve, të dy me rekorde të theksuara kriminale, pasuri që kapin vlerën e tregut rreth 3.700.000 euro.

Policia bën me dije se pas provave të grumbulluara gjatë një hetimi njëvjeçar, u bë ekzekutimi i vendimit për vendosjen e sekuestros preventive ndaj pasurive të luajtshme dhe të paluajtshme në ngarkim të shtetasve Sh. H. 43 vjeç dhe  E. H., 42 vjeç, banues në Tiranë (vëllezër), me precedentë të theksuar kriminalë.

“Shtetasi Sh. H. ka rekorde kriminale në shtetin e Belgjikës, ku ka kryer një vrasje para disa vitesh. Në vitin 2009 të dy vëllezërit Sh. H e E. H. dhe 4 shtetas të tjerë janë arrestuar nga Policia Gjyqësore Federale në Gent, Belgjikë, si pjesëtarë të një grupi kriminal, për veprat penale “Trafikimi i grave për prostitucion” dhe “Substancat narkotike”.

Shtetasi E. H. ka rekorde kriminale në shtetin e Belgjikës, ku ka qenë i përfshirë në hetime nga Prokuroria e Gentit/Belgjikë në dosjen “GIRANA” të vitit 2008, për veprat penale “Trafikim i qenieve njerëzore me qëllim shfrytëzimi për prostitucion” dhe “Pjesëmarrje në organizatë kriminale”. Në këtë dosje shtetasi E. H. ka qenë i dyshuari kryesor dhe është arrestuar në Belgjikë, në datën 02.02.2009. Gjithashtu rezulton se nga viti 2002 deri në vitin 2009, ka qenë i burgosur në Belgjikë, për veprën penale “Trafikim dhe shfrytëzim i prostitucionit”, sqaron policia.

Ndaj 2 vëllezërve, në vitin 2019 kishte nisur procedimi penal për veprat penale “Pastrimi i produkteve të veprës penale ose të veprimtarisë kriminale”.

Asetet dhe llogaritë bankare me vlerë prej 3,7 ml eurosh të sekuestruara nga policia përshijnë 4 apartamente në Tiranë, 2 apartamente në Sarandë,  1 ambient biznesi trekatësh në Laprakë;  1 njësi tregtare, 1 palestër, 7 garazhe dhe dy aktivitete biznesi në Tiranë; 4 automjete BMË X5 dhe llogari bankare në euro, USD dhe lekë dhe gjendjen aktuale në këto llogari  në tri banka të nivelit të dytë.