Ukraina kërkon përjashtimin e Rusisë nga Këshilli i Sigurimit në OKB

Qeveria e Ukrainës i ka bërë thirrje Organizatës së Kombeve të Bashkuara që të marrin në konsideratë rishikimin e statusit të Rusisë si anëtare e përhershme e Këshillit të Sigurimit.

Ministri i Jashtëm, Dmytro Kuleba shprehet se ndërhyrja ushtarake vë në pikëpyetje legjitimitetin e Rusisë në këtë këshill.

Gjatë një fjalimi televiziv, Kuleba kërkoi rishikim ligjor të plotë dhe të paanshëm për pozicionin e përhershëm të Moskës.

“Kemi besim se kur analiza të përfundojë, do të jetë e dukshme se prezenca e Rusisë në Këshillin e Sigurimit në OKB është e paligjshme”, tha Kuleba.

“Çdo gjë varet tek vendosmëria e ekipit ligjor që heton këtë çështje në OKB”, shtoi ministri.

Rusia është një nga pesë anëtaret e përhershme të Këshillit të Sigurimit në OKB bashkë me SHBA, Mbretërinë e Bashkuar, Francën dhe Kinën.

Ky pozicion u lejon këtyre vendeve që të vendosin veton, që do të thotë se këshilli e ka të pamundur të miratojë rezolutë nëse një vend voton kundër.