Rama: Protestuesit nuk janë populli, pakicë që kërkon rrëmujë

Kryeministri, Edi Rama ka bërë një reagim në rrjetet për ditën e tretë të protestave kundër rritjes së çmimeve.

Rama akuzon ish-kryeministrin Sali Berisha dhe Presidentin Ilir Meta si organizatorë të fshehtë, duke theksuar se protestuesit nuk përfaqësojnë popullin.

“Për kë e njeh dorën e nongratave të shpallur e të pashpallur, këto protesta janë një përpjeke e ulët e të të njëjtave hije të së shkuarës, për të manipuluar njerëzit duke hedhur gurin e fshehur dorën! Ky nuk është populli, po e njëjta pakicë e zhurmshme në kërkim të rrëmujës”, shkruan Rama.

Para kryeministrisë dhe në disa qytete të tjera të vendin qytetarët kanë dalë të protestojnë për rritjen e çmimeve.

Protestat nisën për shkak të çmimit të naftës pasi arriti deri në 260 lekë për litër. Pas protestave, çmimi sot ka zbritur në 220 lekë për litër.

Qytetarët kërkojnë që të ndërhyhet më tej për uljen e çmimeve të produkteve të konsumit, duke bërë thirrje për heqjen e TVSH-së.

Të shtunën në orën 11:00, qytetarët kanë paralajmëruar një tjetër protestë në sheshin “Skënderbej”.

Per ke e njeh doren e nongratave te shpallur e të pashpallur, keto protesta jane nje perpjekje e ulet e te te njejtave hije te se shkuares, per te manipuluar njerezit duke hedhur gurin e fshehur doren! Ky nuk eshte populli, po e njejta pakice e zhurmshme ne kerkim te rremujes!

— Edi Rama (@ediramaal) March 11, 2022