Dhuna e policisë mbi artistët, reagon për herë të parë Sandër Lleshaj, kritika opozitës

Ministri i Brendshëm Sandër Lleshaj ka reaguar për herë të parë pas aksionit të Policisë për shembjen e Teatrit Kombëtar. Me një shënim të gjatë në faqen e tij zyrtare në “Facebook”, Lleshaj i është përgjigjur akuzave të artistëve dhe të opozitës për përplasjen e së dielës.

Z.Lleshaj thotë se nuk është ministri ai që jep urdhra operacionale, por se Policia respekton vetëm një urdhër dhe ai është ligji.

“Mjeranë udhëhumbur kujtojnë se ende Policia vepron me urdhra, sipas modeleve të mbrapshta që kanë në kokat e tyre të mallkuara nga totalitarizmi. Në fakt, policia sot nuk merr urdhra për veprimet e saj operacionale. Jo. Ministri i Brendshëm nuk jep urdhra për veprimet operacionale.“Urdhri” i saj i vetëm është ligji, përballë të cilit ajo duhet të jetë thjesht e verbër, për të mos bërë interpretime të tipit: ky është me rëndësi, ky është përtej ligjit, ky është mbi ligjin, ky është vetë ligji, ky është antiligji. Atë ditë që ne do t’i kërkojmë policisë që të bëjë vetë interpretime të ligjit, atë ditë vendi nuk ka më ligj”, thotë Lleshaj.

Teksa vlerësoi maksimalisht rolin e Policisë së Shtetit, e cila sipas tij vepron jo me urdhra politikë, por sipas ligjit, ministri i Brendshëm kritikoi ashpër opozitën.

“Ka pasur këto ditë disa “skifterë” të shkretë, që e kanë kërkuar tek policia shënjestrën e tyre, duke harruar se ajo nuk vendos, as për ndërtimin dhe as për shkatërrimin e ndërtesave. Ka pasur disa syresh që nuk e kanë kursyer as dorën frikacake për të goditur ndaj vajzave dhe djemve të policisë”, shkruan Lleshaj.

Ai shtoi se tek policët qytetarët shqiptarë duhet të shohin ministrin e Brendshëm, ndërsa shtoi se këtë e ka marrë si sfidë personale. 

“Po. Tek policët qytetarët duhet të shohin Ministrin e Brendshëm. Oficerët e policisë mbajnë në uniformë simbolet e Republikës, kanë atributet e zbatuesit të ligjit, kanë përgjegjësi dhe mbrojtje të veçantë ligjore. Për këtë arsye, tek ata duhet ta shohim Ministrin, madje edhe më shumë duhet të shohim Drejtorin e Përgjithshëm të Policisë së Shtetit, drejtuesit e tjerë të saj. Edhe shoqëria jonë mund të shohë tek polici diçka nga vetja. A nuk janë ata, në fund të fundit, një pjesë e saj? A nuk edukohen ata në familjet tona, në shkollat tona, në forumet tona publike? Unë për vete e kam pranuar këtë sfidë të identifikimit edhe me policët e Shqipërisë. Dhe nuk jam zhgënjyer prej saj”, u shpreh ai.