Qeveria ngre bord për rritjen e çmimit të ushqimeve

Qeveria ngre një bord për rritjen e çmimit të ushqimeve, pas ngritjes së bordit për çmimet e karburanteve.

Ky vendim erdhi pasi Banka e Shqipërisë dhe Ministria e Financave pohuan se kriza e çmimeve te larta do të zgjasë deri ne fund të vitit.

Këto institucione e shohin burimin e rritjes tek lufta Rusi-Ukrainë.

“Këto çmime do të vijojnë të mbeten të larta, të paktën dhe gjatë pjesës së mbetur të vitit 2022”, u shpreh guvernatori Gent Sejko të martën.

Familjet me të ardhura të ulëta janë të parat që do të ndjejnë vështirësitë në konsum, teksa po shohin inflacionin te kapërceje mbi 4%.

Për të ndalur thellimin e krizës tek këto familje, qeveria ka vendosur të kontrollojë tregjet përmes bordit.

“Inflacioni i ushqimeve do të jetë një dukuri që do të zgjasë më shumë se harku kohor i këtij viti. Kjo është një nga arsyet kryesore për ngritjen e këtij bordi”, tha ministrja e Financave Delina Ibrahimaj.

Bordi i ushqimeve do të rregullojë çdo javë çmimet për miellin, orizin sheqerin dhe vajin.

Ky është komisioni i dytë pas atij të karburanteve, dhe qeveria po planifikon të kontrollojë me të njëjtën metodë edhe inputet bujqësore.

Në këtë krizë çmimesh, ekonomia shqiptare parashikohet te rritet rreth 3% këtë vit.

LEXONI GJITHASHTU:

• Çmimi i naftës 226 lekë/litër, vendos Bordi i Transparencës