Arrestohet në flagrancë inxhinieri i një firme në Tiranë, procedohet një tjetër

Policia e Tiranës ka arrestuar në flagrancë një inxhinier ndërtimi si dhe ka proceduar penalisht administratorin e një firme tjetër nënkontraktore, për shkelje të rregullave në punë.

Arrestimi i tyre ka ardhur pas ngjarjes së rëndë, ku dje një punëtor 35-vjeçar ka rënë nga pallati dhe për pasoja ka humbur jetën. Policia dhe grupi hetimor ka nisur punën për idetifikimin dhe zbardhjen e rrethanave të ngjarjes.

“Arrestohet në flagrancë inxhinieri i një firme ndërtimi dhe procedohet penalisht administratori i firmës nënkontraktore, pasi shkelën rregullat e mbrojtjes në punë. Nga specialistët për Hetimin e Krimit në Komisariatin e Policisë Nr. 6 u bë arrestimi në flagrancë, për veprën penale “Shkelja e rregullave të mbrojtjes në punë”, i shtetasit R. P., inxhinieri i firmës ndërtuese (personi përgjegjës për sigurinë e punëtorëve në punë), pasi ditën e djeshme, në rrugën “3 Dëshmorët”, në një pallat në ndërtim, ka rënë nga lartësia punëtori shtetasi A. K., 35 vjeç, i cili ka ndërruar jetë gjatë rrugës për në spital. Në vijim të veprimeve u procedua penalisht shtetasi E. K., administratori i firmës nënkontraktore”, njofton policia.