‘Rusia harroi mësimet e Luftës së Dytë Botërore’, Zelenski reagon ndaj Lavrov

Rusia ka harruar të gjitha mësimet e Luftës së Dytë Botërore, tha presidenti ukrainas Volodimir Zelenski në një fjalim mbrëmjen e së hënës.

Kjo deklaratë e Zelenskit erdhi pasi ministri i Jashtëm rus Sergey Lavrov pretendon se Adolf Hitler kishte gjak hebre, shkruan CNN. 

“Një shtysë e tillë anti-semite nga ministri i tyre do të thotë se Rusia i ka harruar të gjitha mësimet e Luftës së Dytë Botërore. Ose ndoshta ata kurrë nuk i kanë studiuar ato mësime. Sigurisht që sot ka një skandal të madh në Izrael lidhur me këto fjalë. Megjithatë, askush nuk dëgjon kundërshtime apo justifikime nga Moska. Ka heshtje”, tha Zelenski.

Vërejtjet e Lavrov nxitën gjithashtu një përgjigje të furishme nga Izraeli, me Ministrin e Jashtëm izraelit Yair Lapid që i quajti ato të pafalshme, duke shtuar se “hebrenjtë nuk vranë veten në Holokaust”.

“Si mund të thuhet kjo në prag të përvjetorit të fitores ndaj nazizmit? Këto fjalë nënkuptojnë se kryediplomati rus po fajëson popullin hebre për krimet naziste. Pa fjalë”, u shpreh më tej tej Zelenski.

LEXONI GJITHASHTU:

• Deklarata e Lavrovit se Hitleri kishte gjak hebre zemëron Izraelin
• Lavrov: Rusia nuk e konsideron veten në luftë me NATO-n
• Më shumë se 200 civilë ende të bllokuar në fabrikën e çelikut në Mariupol