Berisha: Nuk do shpik rival në garën për kryetar të PD-së

Ish-kryeministri Sali Berisha thotë se gara për kryetarin e ri të Partisë Demokratike do të jetë transparente.

Pyetur nga gazetari i “Euronews Albania” Ardit Hoxha se si do ndihej nëse nuk do kishte rivalë përballë tij, Berisha tha se ai futet në garë për të fituar votat dhe besimin e anëtarësisë.

Ai shtoi se nuk do të sajojë apo shpikë ndonjë rival që të garojë kundër tij.

“Gara ime nuk bëhet për rivalë por për anëtarët e PD-së. Unë do të paraqitem për të fituar votat dhe besimin e anëtarëve. Se çfarë vendimi do marrin të tjerët ajo nuk ka lidhje me mua. Ajo është vendim personal i gjithësecilit. Cilido që të kandidojë, e garantoj se ai komison do të krijojë të gjitha kushtet dhe mundësinë për një garë transparente. Nuk sajoj dhe nuk shpik rivalë”, tha ish-kreu i qeverisë.

Në lidhje me vendimin e GJKKO për konfiskimin e disa pasurive të deputetit demokrat Kasëm Mahmutaj, Berisha tha se lajmin e ka dëgjuar nga mediat dhe se nuk ka informacione.

Berisha nënvizoi se do t’i ndjekë zhvillimet në lidhje me këtë çështje.

Mahmutaj është deputet i qarkut të Beratit dhe njihej si mbështetës i ish-kryedemokratit Lulzim Basha, por mori pjesë në Kuvendin e 30 prillit.

LEXONI GJITHASHTU

• Deputetë me plaftormë nga qeveria s’mund të mbajnë peng PD-në, thotë Berisha
• Berisha: Anëtarësia e PD u bashkua, rreth 41 mijë votues për kryetarë të degëve
• 7 maji, afati i fundit për paraqitjen e kandidaturave për kryetar të PD-së