Serbia duhet të vazhdojë me reformat për t’u anëtarësuar në BE, thotë Scholz

Serbia duhet të ecë përpara me reformat, duke përfshirë atë për lirinë e medias, për të realizuar ambicien e saj për t’u bashkuar me Bashkimin Evropian, tha të mërkurën kancelari gjerman Olaf Scholz, duke shtuar se dëshiron që të gjitha vendet e Ballkanit Perëndimor të bëhen anëtarë.

“Për Serbinë është e rëndësishme që ajo të vazhdojë rrugën e saj të reformave dhe kjo përfshin lirinë e medias dhe luftimin e krimit të organizuar”, tha Scholz në një konferencë të përbashkët shtypi me presidentin serb Aleksandar Vuçiç.

Më herët, në një konferencë për shtyp me kryeministrin e Kosovës, Albin Kurti, Scholz e bëri të qartë se vendet e Ballkanit Perëndimor i sheh si pjesë të Evropës.

“Në të ardhmen, të gjitha vendet e tij duhet t’i përkasin Bashkimit Evropian”, tha Scolz, duke premtuar se do të bëjë gjithçka që mundet për të ndihmuar procesin.

Në gjysmën e dytë të vitit, Scholz do të udhëtojë në rajon, i cili përfshin Malin e Zi, Bosnje-Hercegovinën, Maqedoninë e Veriut, Shqipërinë, Serbinë dhe Kosovën. Ai gjithashtu do t’i ftojë vendet në bisedime për bashkëpunimin rajonal.

LEXONI GJITHASHTU:

• Kurti: Kosova mbështet Procesin e Berlinit, jo iniciativa paralele
• Scholz: Do të angazhohem për liberalizimin e vizave me Kosovën