88-vjeçari në Infektiv vdiq nga infarkti, jo nga COVID-19

Një pacient 88 vjeç nga Tirana vdiq mbrëmjen e së hënës në Spitalin Infektiv. Referuar shërbimit infektiv, shkaku i humbjes së jetës ishte si pasojë e arrestit kardiak nga insuficienca kardio-respiratore.

I moshuari ishte bartës i COVID-19, por asimtomatik për sëmundjen. 88-vjeçari vuante nga insuficienca renale kronike, stadi I katërt, diabet, hipertension, anemi.

Më herët gjatë ditës pati një tjetër vdekje. Një 76-vjeçare me diabet, humbi jetën si pasojë e një tumori në pankreas. Ajo ishte e infektuar, por sipas mjekëve nuk kishte shfaqur sëmundje nga COVID-19 dhe për këtë arsye autoritetet nuk e përfshinë në bilancin total.

Gjatë 24 orëve të fundit në vendin tonë janë kryer 102 testime dhe kanë rezultuar 6 raste pozitive me COVID-19.

Aktualisht po trajtohen 28 të prekur në Spitalin Infektiv, nga të cilët 3 janë në terapi intensive, njëri prej tyre është i intubuar. Në 24 orët e fundit janë shëruar 5 qytetarë, duke e çuar në 877 numrin e të shëruarve.

Nga fillimi i epidemisë janë kryer mbi 16 mijë testime molekulare dhe serologjike. Që nga fillimi i epidemisë janë 1143 rast e të konfirmuara. Aktualisht janë 233 persona aktivë me COVID19, kryesisht në Tiranë, Durrës dhe Krujë.