Gjyqi ndaj liderëve të UÇK-së pritet të nisë në 2023, thotë juristi

Avokati Taulant Hodaj thotë se gjykimi për katër ish-drejtuesit e UÇK-së që ndodhen në Hagë pritet të nisë në mesin e vitit të ardhshëm.

“Me zgjerimin e aktakuzës, gjykimi nga qershori i këtij viti që ishte parashikuar të niste, tani do të shtyhet nga mesi i vitit tjetër”, tha Hidaj.

Sipas avokatit rasti i Thaçit, Krasniqit, Veselit dhe Selimit është voluminoz dhe parashikohet të zgjasë më shumë se rastet e tjera.

Fillimisht ishte parashikuar që gjykimi të niste në qershorin e këtij, por me ndryshimin e aktakuzës, e gjitha procedura nis nga fillimi.

“Është prokuroria që po pengon nisjen e gjykimit me këtë veprim të zgjerimit të aktakuzës”, tha avokati.

Avokati tha se në Hagë “aplikohen standardet e Gjykatës së të Drejtave të Njeriut dhe avokatët duhet t’i frytëzojnë këto të drejta”.

“Dy vite është një afat optimal për paraburgimin deri sa të nisë gjykimi”, u shpreh Hodaj.

Sipas juristit, të akuzuarit “nëse shpallen të pafajshëm kanë të drejtë të kërkojnë kompensimin e dëmit”.

Hashim Thaçit, Jakup Krasniqi, Kadri Veseli dhe Rexhep Selimi ndodhen në paraburgim prej 1 vit e gjysmë.