Rezerva për ushqimet, qeveria del garant për kreditë e furnizuesve me shumicë

Të gjitha kompanitë e mëdha që importojnë produkte ushqimore bazë nga jashtë për të furnizuar tregun vendas do të ndihmohen nga qeveria.

Nëpërmjet një akti normativ, Këshilli i Ministrave ka vendosur që t’u dalë garant në kredimarrje kompanive me qëllim mbajtjen e rezervave deri në 3 muaj për përballimin e situatës pa krijuar ndërprerje në treg.

“Për mbajtjen e rezervave sipas kësaj pike, me qëllim përballimin e situatës së veçantë të krijuar në treg, Këshilli i Ministrave miraton garanci shtetërore të huas me bankat tregtare për garantimin e huamarrjes së subjekteve që tregtojnë me shumicë produkte ushqimore bazë, si dhe kushtet e kriteret e marrëveshjes tip të garancisë dhe marrëveshjes tip të mirëkuptimit”, thuhet në vendim.