Marshimi për dhunën seksuale, studentja: Të rritet dënimi për abuzuesit

Në sheshin “Nënë Tereza”, sot është organizuar një marshim me sloganin “Ti nuk je vetëm”. marshimi vjen si reagim ndaj abuzimit të një 15-vjeçareje nga roja i shkollës, ku ajo mësonte në periferi të Tiranës. 

Ky marshim-proteste për t’i thënë stop dhunimit të vajzave dhe grave, ka si nismëtare një nxënëse të shkollës “Besnik Sykja”. Thirrjes së saj iu bashkuan me qindra persona.

Era Gjoni, studente, është një prej atyre që punoi gjithashtu për organizimin e kësaj proteste, e cila thotë se është e befasuar nga pjesëmarrja.

“Është një kauzë edhe pse nuk na prek drejtpërdrejtë, prek të gjithë shoqërinë dhe nesër apo pasnesër mund ti ndodhi gjithkujt. Kemi bërë dhe protesta të tjera por nuk kemi pasur mbështetje dhe pjesëmarrje kaq të madhe sa kishte sot. Nuk besoj se do të jetë i pari dhe i fundit marshim”, shprehet ajo.

Lidhur me kërkesat, studentja theksoi se ato kanë të bëjnë me rritje e dënimit të abuzueseve mbi fëmijët si dhe marrjen e masave për parandalimin e rasteve të tilla.

“Kërkesa e parë ishte rritja e dënimit për abuzuesit me minorenët. Një tjetër kërkesë ishte publikimi i regjistrit publik i abuzuesve seksualë dhe kastrimi kimik i pedofilëve. Më e rëndësishme është të mos heshtësh, e di që është vështirë të përballësh me mentalitetin shqiptar, por mund t’i thuash dikujt që e ndjen afër”, përfundoi Era Gjoni.