Nisin provimet e Maturës Shtetërore 2026, sot provimi i Gjuhës së Huaj

Mbi 26.600 maturantë në të gjithë vendin nisin sot provimet e Maturës Shtetërore 2026, me testin e parë, atë të Gjuhës së Huaj. Procesi do të vijojë më 9 qershor me provimin e Gjuhës Shqipe dhe Letërsisë, më 16 qershor me Matematikën dhe do të përmbyllet më 23 qershor me provimin me zgjedhje.

Në të gjithë vendin janë 144 qendra provimi, ndërsa procesi monitorohet nga mësues administratorë, përfaqësues të Ministrisë së Arsimit dhe vlerësues të testeve. Nxënësit duhet të paraqiten në orën 08:30 dhe provimi zhvillohet nga ora 10:00 deri në 12:00.

Ministria ka bërë të ditur gjithashtu rregullat e procesit, përfshirë ndalimin e telefonave celularë dhe pajisjeve smart gjatë testimit, si dhe detyrimin për t’u pajisur me mjet identifikimi dhe materialet bazë të lejuara.

Ministrja e Arsimit, Mirela Kumbaro, ka përcjellë një mesazh urimi dhe inkurajimi për të gjithë nxënësit që i nënshtrohen provimeve, si dhe për mësuesit dhe stafet që po ndjekin mbarëvajtjen e procesit.