Zamir Dedej: Cilësia e ujërave në plazhet shqiptare, e shkëlqyer. Nuk kemi asnjë vijë të kuqe

Agjencia Evropiane e Mjedisit publikoi raportin e vitit 2019 mbi cilësinë e ujërave të plazheve në vendet e Bashkimit Evropian ku vlerësimi ndahet në ujëra me cilësi të shkëlqyer, të mirë, të mjaftueshëm dhe të varfër apo të dëmshëm për shëndetin.

Teksa në Bashkimin Evropian, cilësia e shkëlqyer e ujërave është në një mesatare rreth 85%, në Shqipëri niveli është 60%, që e rendit vendin tonë të parafundit në listë, duke lënë pas vetëm Poloninë

Në një lidhje të drejtpërdrejtë me Euronews Albania, Zamir Dedej, drejtor i Agjencisë Kombëtare të Zonave të Mbrojtura (AKZM), tha se përkundër raportit të Agjencisë Evropiane, të dhënat e publikuara nga Agjencia Kombëtare e Mjedisit që është caktuar për monitorimin e ujërave të plazheve, tregojnë se këto të fundit në Shqipëri janë të shkëlqyera.

“Nuk e kam të qartë se nga e ka marrë agjencia evropiane këtë informacione, kam përpara tabelën e fundit të publikuar prej Agjencisë Kombëtarë e Mjedisit, që në bashkëpunim me Institutin e Shëndetit Publik kryejnë monitorimin e plazheve për dy elementë; për koliformën dhe esheria kolin.

Dhe me përjashtim të 2-3 pikave në Durrës dhe Vlorë, cilësia e ujërave shqiptare është e shkëlqyer”, tha z. Dedej.

Kreu i AKZM theksoi se raporti i vitit 2020, i sapopublikuar është akoma më inkurajues dhe kjo sipas tij falë një sërë impiantesh për pastrimin e ujërave të zeza që kanë pasur një impakt shumë pozitiv në ujërat e plazheve.

“Nuk e di burimin e të dhënave ku mbështetet raporti i Agjencisë. Zonat e porteve sigurisht që kanë ndotje, por ato nuk janë zona plazhi. Porti i Shëngjinit dhe ai i Durrësit janë më të mëdhenjtë që kemi, por janë të distancuar nga plazhet.

Të dhënat e Agjencisë Kombëtare të Mjedisit për plazhet 2020 sapo kanë dalë dhe konfirmojnë trendin e 2019-s, ku 96-98 për qind e ujërave kanë cilësi të shkëlqyer. Nëse raporti i agjencisë i referohet porteve, është tjetër gjë”, tha z. Dedej.

Sipas tij, në Shqipëri nuk ka plazhe me vijë të kuqe, ndryshe nga sa mund të thuhej vite më parë kur ujërat e zeza derdheshin në det.