PD mbështet vendimin e Metës për të mos dekretuar heqjen e taksave për importin e jahteve

Partia Demokratike përshëndeti kthimin për rishqyrtim të ligjit që i heq taksat importit të jahteve në Shqipëri.

Përmes një postimi në Facebook, ish-deputetja Jorida Tabaku u shpreh se ky ligj ishte i palogjikshëm dhe “kriminal”. Ajo theksoi se teksa qeveria kërkoi heqjen e tatimit mbi vlerën e shtuar (TVSH) për importin e jahteve “të oligarkëve”, bizneset e vogla paguajnë tvsh.

“Ky projektligj bëhet edhe më i paturpshëm në kushtet e një krize të thellë që ka kapur jetën e çdo shqiptari. Kur bizneset mbyllen masivisht, kur papunësia rritet, kur konsumi ulet, investimet e të ardhurat bien e çdo taksë rritet qeveria përsëri mendon të favorizojë klientët e saj,” – u shpreh Tabaku.

Për demokratët ligji në fjalë u miratua në një “parlament kukull” pak ditë pasi bizneset u detyruan të paguanin tvsh-në edhe pse kishin qenë të mbyllura prej pandemisë.

“Mzhoranca nuk e ka mendjen tek qytetarët e vendit por tek një pakicë, të cilën e furnizon me lehtësira fiskale si kjo që Presidenti Meta e rrëzoi,” – këmbënguli ish-deputetja e PD-së.

Të martën Presidenti ktheu për rishqyrtim ligjin në fjalë duke e shoqëruar me dyshimin se ai bëhej për natyra klienteliste dhe preferenciale ndërsa nuk shoqërohej me analiza ekonomike se çfarë fitimesh do të kishte vendi nëse lejohet importi i jahteve pa tatime.

Lexoni gjithashtu:

Meta kthen ligjin që heq taksat e importit të jahteve

Jahti superluksoz i milarderëve ‘Maltese Falcon’ dëbohet me forcë nga Kapiteneria e Portit të Durrësit

Rregulla për mjetet lundruese, një draft i ministrisë së Mjedisit adreson turizmin detar