Opozita parlamentare i paraqet Ruçit kundërshtitë për marrëveshjen e reformës zgjedhore

Kryetarët e 3 grupeve opozitare të parlamentit takuan të mërkurën Kryetarin e Kuvendit, Gramoz Ruçi, të cilit i paraqitën kundërshtitë që ata kanë rreth marrëveshjes për reformën zgjedhore.

Zyra për shtyp e Kuvendit njoftoi se gjatë takimit me Ruçin, Myslim Murrizi, Edmond Stojku dhe Nimet Musai paraqitën kundërshtitë e propozimeve të Këshillti Politik për sa i përket depolitizimit të administratës zgjedhore dhe mosndryshimit të sistemit zgjedhor.

Ndryshe nga sa u vendos në tryezën zgjedhore, përfaqësuesit e opozitës parlamentare kërkojnë si çështje kryesore proces me lista të hapura.

“Ata nënvizuan se këto ndryshime duhet të shqyrtohen e votohen në Kuvend, i cili, si organ ligjvënës, është institucioni legjitim për të realizuar reformën zgjedhore,” – citohet në informacionin e bërë me dije nga Kuvendi.

Pas arritjes së një marrëveshje mes partive kryesore javën e shkuar, reforma zgjedhore pritet të kalojë për votim në parlament.

Miratimi kërkon votë të cilësuar, thënë ndryshe 84 vota. Zyrtarisht Partia Socialiste ka 75 deputetë, ndërsa në parlamentin me 122 deputetë, 3 grupimet opozitare të cilat kanë kundërshti ndaj marrëveshjes kanë 31 vota.

Në dalje nga Kuvendi, Muslym Murrizi tha se “askush nuk mund të tallet me sovranitetin e votës apo mandatit” të deputetëve.

“Ne nuk mund të rrinim për të vazhduar normalitetin, aq më tepër kur prioritet i parlamentit është reforma zgjedhore dhe jo arnimet për të lënë në fuqi marrëveshjen e 2008. Nuk është tagri im të merren me sharlatanë që kërkojnë të marrin poste. Unë jam deputet dhe nuk do ta votoj arnimin nëse nuk merren parasysh listat e hapura, depolitizimi i administratës dhe vota e emigrantëve,” – tha Murrizi pas takimit me Ruçin.

Njësoj si Murrizi u shpreh dhe Nimet Musai, i cili këmbënguli se nuk do ta votonte reformën.

Në njoftimin e shpërndarë për shtyp nga Kuvendi, thuhet se Ruçi ka vlerësuar kontributin e deputetëve opozitarë për ligjet që kanë kërkuar shumicë të cilësuar dhe se parlamenti “si institucioni legjitim për kryerjen e reformës zgjedhore, duhet dhe do të respektojë sensibililitetin e të gjithë grupeve parlamentare për realizimin e ndryshimeve ligjore”.

Lexoni gjithashtu:

Opozita do të radikalizohet, pritet takim me Ruçin, Murrizi: Këshilli zëvendësoi Parlamentin

Maliqi: Opozitën në parlament e komandon Rama, topi i reformës zgjedhore i ka kaluar atij