Harta e re gjyqësore, Maks Haxhia tregon si mund të zgjidhej situata

Harta e re gjyqësore për Gjykatat e Apelit, Administrative, dhe për Shkallën e Parë ka pothuajse përgjysmim në të gjithë nivelin e gjykatave në vend.

Kreu i Dhomës së Avokatisë, Maks Haxhia thotë se problemi fillon tek gjykatat e apelit, të cilat qendërzuar të gjitha në Tiranë.

Në emisionin “Sot” në Euronews Albania, ai tha se është dhënë një propozim nga Komuniteti i Avokatëve për KLGJ-në.

“Në komunitetin e avokatëve ka juristë të shkëlqyer që mund t’i angazhojnë derisa të plotësohen vakancat në sistem e të bëhet i plotë procesi i vetingut”, tha Haxhia.

“Ne seleksionuam më të mirët, dhe i thamë KLGJ-së merr kë të duash”, shtoi ai.

Avokati Gentian Rumano thotë se harta e re do të cenojë aksesin në gjykatë për shumë individë, do të rrisë kostot, angazhimin e avokatëve nga rrethet për të pasur qasje në gjykatën e Tiranës.

“Nuk e di si mund ta kenë menduar, pasi kjo nuk garanton akses për qytetarët”, u shpreh Rumano në emisionin Sot në Euronews Albania.

Avokati Esmerald Xhafaj thotë se nga KLGJ është marrë vendimi për mbylljen e Gjykatës Apelit, dhe Administrative të Shkallës së parë në Korçë, si edhe Gjykata e Pogradecit por nuk është përcaktuar se si do të vijohet me ushtrimin e detyrës së gjyqtarëve.

LEXONI GJITHASHTU:

• Asnjë gjyq në gjykatat e vendit, pezullohen mbi 1 mijë seanca