Ndër të fundit në Evropë, shqiptarët nuk janë njohës të mirë të gjuhëve të huaja

Shqipëria është një nga vendet e Evropës me përqindjen më të lartë të popullsisë vendase të cilët nuk njohin asnjë gjuhë të huaj. Sipas statistikave të Eurostat, gati 60% e shqiptarëve nuk dinë asnjë gjuhë veç gjuhës shqipe, rreth 26% e tyre dinë një gjuhë tjetër përveç gjuhës së nënës, ndërsa rreth 11% e popullsisë në vend flet 2 gjuhë të huaja. Për njohjen e dy gjuhëve të huaja shqiptarët renditen të pestët mes vendeve të Bashkimit Evropian për njohuri të ulëta në gjuhët e huaja.

Ndërkohë referuar të dhënave të Eurostat, vetëm 3.2% e popullsisë shqiptare flasin më shumë se 3 gjuhë.

Si Shqipëria paraqiten dhe vendet e rajonit, ku sipas Eurostat 64% e popullsisë rumune nuk flet asnjë gjuhë të huaj, e ndjekur nga Bosnja me 61% të popullsisë.

Në rajon përqindjen më të ulët të popullsisë, të cilët nuk zotërojnë asnjë gjuhë të huaj, e kanë Maqedonia dhe Serbia.

Për sa i përket shteteve të tjera, rekordin e mban Turqia, ku 82% e popullsisë turke nuk flet asnjë gjuhë të huaj, përveç turqishtes. Më pas vjen populli britanik, të cilët kanë fatin që gjuhën e tyre ta flasin në pothuajse gjithë vendet e botës dhe mesa duket kjo i bën ”dembelë” për të mësuar një gjuhë tjetër.

Përqindjen më të ulët të popullsisë, të cilët nuk janë njohës të asnjë gjuhe të huaj e mbajnë nordikët, ku variojnë me 3% në Suedi dhe 8% në Norvegji e Finlandë.

Për sa i përket popullsisë së BE-së në tërësi, sipas të dhënave të publikuara nga Eurostat në lidhje me njohuritë që kanë qytetarët për gjuhët e huaja rezultoi se 35% e qytetarëve nuk dinë asnjë gjuhë të huaj.