Vala e të nxehtit në Shqipëri, Ministria e Shëndetësisë nxjerr masat për qytetarët: Ja çfarë duhet të bëni

Vala e të nxehtit që ka përfshirë Shqipërinë gjatë ditëve të fundit ka sjellë temperatura të larta në të gjithë vendin, duke ngritur alarmin për ndikimin që mund të kenë në shëndetin e qytetarëve. Më të ekspozuar ndaj rreziqeve mbeten të moshuarit, fëmijët dhe personat që vuajnë nga sëmundje kronike.

Përballë kësaj situate, Ministria e Shëndetësisë ka apeluar për vigjilencë dhe respektim të masave mbrojtëse, duke përcjellë rekomandimet e specialistëve të Institutit të Shëndetit Publik.

Ekspertët theksojnë rëndësinë e konsumimit të rregullt të lëngjeve, shmangien e qëndrimit në diell gjatë pikut të temperaturave dhe preferimin e ambienteve të freskëta e të ajrosura.

Po ashtu, qytetarët këshillohen të veshin rroba të lehta dhe të kërkojnë menjëherë ndihmë mjekësore nëse shfaqin shenja si marramendje, lodhje e theksuar apo vështirësi në frymëmarrje.

Sipas autoriteteve shëndetësore, temperaturat e larta pritet të vijojnë edhe në ditët e ardhshme, ndaj kujdesi dhe respektimi i këshillave mbetet thelbësor për të shmangur problemet shëndetësore të lidhura me vapën.