90 familje të komunitetit rom 9 muaj pa bonus strehim, ngrihen në protestë

Dhjetëra përfaqësues të familjeve të komunitetit rom dhe egjiptian u mblodhën para Bashkisë së Durrësit për të protestuar ndaj mosdhënies së bonusit të strehimit. Banorët e zonës së Nishtullës thonë se prej nëntë muajsh nuk kanë marrë pagesat e qirasë që përfitojnë nga programi i strehimit.

Sipas protestuesve, vonesat e zgjatura dhe premtimet e pambajtura për kalimin e fondeve i kanë vendosur përballë vështirësive serioze me pronarët e banesave ku jetojnë me qira.

Pas tensioneve të krijuara para institucionit vendor, një përfaqësi e banorëve u prit në bashki për të diskutuar mbi problematikën dhe afatet e zgjidhjes së saj.

Sipas informacioneve, lista me rreth 90 përfitues pritet të firmoset nga kryetarja e Bashkisë së Durrësit, çka do t’i hapë rrugë transferimit të pagesave në llogaritë bankare të familjeve përfituese.

Sipas përfaqësuesit të shoqatës “Ushten”, Ismail Jakupi, vonesat lidhen me procesin e verifikimit të dokumentacionit, si dhe me moskalimin në kohë të fondit nga Ministria e Financave.

Në listat e përfituesve të bonusit të strehimit, që mbulon 50 për qind të qirasë, përfshihen rreth 250 persona nga komunitetet rom dhe egjiptian, ndërsa numri total i përfituesve arrin në 412 persona.

Sipas përfaqësuesve të Bashkisë së Durrësit, fondet pritet të kalojnë në ditët në vijim jo vetëm për familjet e komunitetit rom dhe egjiptian, por edhe për përfituesit e tjerë të skemës së bonusit të strehimit.