Basha ia faturon Ramës përgjegjësinë për situatën me COVID-19

Kryetari i Partisë Demokratike, Lulzim Basha, ngarkoi mbrëmjen e së martës kryeministrin Edi Rama me përgjegjësinë e situatës së krijuar javën e fundit me infeksionin e COVID-19.

Përmes disa postimesh në rrjetin social Twitter, Basha tha se Rama nuk i mori parasysh sugjerimet e shumta të opozitës për të kryer më shumë teste, për të garantuar mbrojtjen e personelit shëndetësor, për të mbyllur fasoneritë dhe ‘Call-Center”-at si vende ku mund të përhapej virusi dhe as për hartimin e një strategjie konkrete për daljen nga karantina.

“Ai nuk bëri asgjë. Rama e kishte mendjen tjetërkund: te shfaqjet dhe zdërhalljet me orë para ekranit si narcisti para pasqyrës, tek tenderat sekretë me miliona euro vjedhje në kohë pandemie, te pagesat nga taksat e shqiptarëve për inceneratorët dhe landfillet e Bandës së Lushnjës dhe jo të siguronte testimet e duhura apo të mbështeste qytetarët në vështirësi dhe ekonominë në krizë të thellë,” – u shpreh Basha duke këmbëngulur se “kërcënimi më i madh për shëndetin dhe ekonominë e qytetarëve është qeveria”.

Komenti i Bashës erdhi pak orë pasi kryeministri Edi Rama deklaroi se situata e COVID-19 ishte kthyer shqetësuese, por që sidoqoftë nuk do të shoqërohej me rimbyllje të vendit.

Në deklaratën e tij Rama paralajmëroi ashpërsime të masave ndëshkuese për ata që nuk respektojnë rregullat dhe protokollet shëndetësore.

Nëse Rama do të kishte bërë testime si në çdo vend tjetër, ne do ta dinim ku dhe si po përhapet koronavirusi. E kam ngritur këtë çështje me qindra herë, javë pas jave duke nënvizuar se testimi është element shumë i rëndësishëm edhe për strategjinë e daljes.

— Lulzim Basha (@lulzimbasha_al) June 16, 2020

Lexoni gjithashtu:

Kryeministri Rama: Nuk ka më karantinë, do ashpërsohen masat