Petrit Vasili akuzon kryeministrin se ka përdorur politikisht pandeminë

Nënkryetari i Lëvizjes Socialiste për Integrim, Petrit Vasili në një deklaratë për media nga selia e LSI akuzoi kryeministrin për keqmenaxhim të situatës së pandemisë duke refuzuar të bëjë testime masive çka sipas tij solli përkeqësimin e situatës në vend të sillte përmirësim të saj.

Kjo strategji e gabuar sipas tij solli fundosjen e ekonomisë së vendit.

“Sot Shqipëria ka 4 herë më shumë raste të reja se sa në momentin e pikut, të gjitha vendet më të prekura, që nga Italia në momentin e hapjes rastet filluan të uleshin, në Shqipëri ndodh e kundërta.

Mungesa e testimeve dhe aktivizimi i mjekëve të familjes në terren u bënë me qëllimin e lig për të fshehur shifrat.

Sot 47 për qind e bizneseve janë mbyllur, 42 për qind vazhduan punë pjesërisht dhe 32 për qind e tyre kanë shkurtuar personelin. Të lumtur qenë vetëm oligarkët që i morën rregullisht pagesat e tyre edhe përmes eurobondit. Shqiptarët, dhe më fatlumët, kanë marrë 400 mijë lekë te vjetra për 4 muaj”, tha ai.

Sipas z. Vasili, kryeministri është bërë i pabesueshëm përpara shqiptarëve, pasi mohoi edhe paketën e tretë ekonomike që premtoi se do të lëvronte që në maj, ndaj e ka humbur të drejtën të qeverisë shqiptarët

“Ora e Edi Ramës ka mbaruar. Shqiptarët janë të detyruar ta refuzojnë dhe të mos pranojnë më asnjë urdhër prej tij”, tha nënkryetari i LSI.