Lituania ndalon me ligj importin e gazit rus

Lituania ka ndaluar ligjërisht importin e gazit natyror rus, me përjashtim të tranzitit të tij në rajonin Kaliningrad.

Ndryshimet në Ligjin për Gazin Natyror u miratuan nga parlamenti i këtij shteti baltik me 123 vota pro dhe dy abstenime.

Pas miratimit të ndryshimeve në ligj, sistemi i transmetimit të gazit natyror dhe terminali i gazit natyror të lëngshëm “Klaipedos nafta” do të jenë në dispozicion vetëm për furnizuesit nga vendet që nuk paraqesin kërcënim për sigurinë kombëtare, me përjashtim të atyre që transportojnë gaz në transit për në Kaliningrad.

Në vitin 2015, Gazprom dhe AB Amber Grid nënshkruan një marrëveshje për tranzitin e gazit rus përmes Lituanisë në rajonin Kaliningrad.

Kontrata u nënshkrua për dhjetë vjet dhe parashikon transportin e deri në 2.5 miliardë metra kub gaz në vit përmes gazsjellësit Minsk-Vilnius-Kaunas-Kaliningrad.

Deri vonë, kjo ishte e vetmja rrugë tranziti për në rajonin e Kaliningradit.