SHELL zbulon naftë dhe gaz, Rama: Përfitojmë ne dhe Europa

Kompania holandeze Shell ka zbuluar sasi të konsiderueshme nafte dhe gazi në nëntokën shqiptare.

Shell Albania është vendosur prej 8 vjetësh në Shqipëri dhe është duke kërkuar naftë dhe gaz në blloqet 2 dhe 3 afër malit Shpirag, ndërsa përpara disa vjetësh nisi kërkimet në bllokun 4 në afërsi të Gjirokastrës.

Lajmin e ka dhënë  kryeministri Edi Rama gjatë një takimi në Holandë me investitorë të këtij vendi, duke theksuar se nëse sasitë janë ato që vlerësohen, zbulimi do të ndikojë në të ardhmen e furnizimit me lëndë djegëse të Shqipërisë dhe Europës.

“Shenjat tregojnë se mund të jemi pranë një zbulimi shumë të rëndësishëm të gazit dhe naftës nën tokë, që do të ndikojë të ardhmen e vendit tonë por edhe do të luajë rol në të ardhmen energjetike të Europës”, tha Rama.

Si potencial në rritje të vendit Ministrja e Infrastrukturës dhe Energjisë Bleinda Balluku tregoi planin për ndërtimin e një porti të ri tregtar në zonën e Porto Romanos, për të cilin ka nisur edhe hartimi i projektit.

“Ne jemi duke punuar në strategjinë e transportit të vendit dhe një nga synimet kryesore është lidhja me hekurudhë, porte dhe aeroporte. Jemi duke bërë projektin e portit të ri tregtar në zonën e Porto Romanos, i cili do të ketë një infrastrukturë shumë më të përshtatshme dhe kapacitete më të mëdha”, u shpreh Balluku.

Në ftesën e qeverisë shqiptare për të ardhur dhe investuar, kompanitë holandeze shfaqën frikën e stabilitetit politik, element të cilin kreu i qeverisë e barazoi me protesta të ngjashme që ndodhin edhe në shtete të tjera të Bashkimit Europian.

LEXONI GJITHASHTU:

• Rama: Sasi e madhe nafte dhe gazi është zbuluar në nëntokën shqiptare
• Kriza e çmimeve, tek ne u shtrenjtua nafta e ushqimet, në Europë energjia