Kitara e Kurt Cobain shitet për 6 milionë dollarë 26 vjet pas vdekjes së tij

Kitara akustike që Kurt Cobain përdori gjatë performancës së njohur të “MTV Unplugged” në vitin 1993 është shitur për 6 milionë dollarë gjatë një ankandi.

Kjo shumë është paguar nga prodhuesi australian i mikrofonave, Peter Freedman, i cili është tashmë pronari i një kitare “Martin D-18E” të vitit 1959.

Kjo është një shenjë që tregon se edhe 26 vjet pas vdekjes së tij, Cobain mbetet një figurë e madhe në muzikë dhe këngët e grupit të tij “Nirvana” akoma dëgjohen nga adhurues të muzikës. 

Martin Nolan, shefi ekzekutiv i qendrës së ankandit u shpreh se kjo kitarë ishte tipike në stilin që Cobain adhuronte.

“Kurti nuk kërkonte kitara luksi apo të shtrenjta”, tha ai.

“Ai donte një kitarë që i përshtatej, pasi ai përdorte dorën e tij të majtë, kështu që i duhej diçka që mund të përdorej me dorën e majtë, si kitarat Martin, prandaj ajo ishte kaq e rëndësishme për të”, shtoi Nolan.

Performanca e grupit Nirvana në “MTV Unplugged” ishte një ndër të fundit, përpara vdekjes së Kurt Cobain.

Por kjo kitarë nuk është i vetmi objekt i Kurt që është shitur në ankand.

“Gjatë asaj performance, Cobain mbante veshur një pulovër jeshile, të cilën me shumë gjasa e kishte blerë në një dyqan të rrobave të përdorura për shumë pak dollarë, madje kishte edhe të djegura cigareje. Atë e shitëm tetorin e shkuar për 334 mijë dollarë”, tregon Nolan.