Gërvalla-Lajçakut: Mos prisni luftë si në Ukrainë që t’i hapni dyert Ballkanit

Në samitin e Dubrovnikut nuk munguan replikat për dialogun Kosovë-Serbi por edhe për procesin e integrimit të Ballkanit në Bashkimin Europian.

I dërguari special i Bashkimit Europian për Ballkanin, Miroslav Lajçak deklaroi se së shpejti janë gati 3-4 marrëveshje që priten të finalizohen.

Megjithatë ai pranoi se ky proces ka vonesa dhe se Bashkimi Europian duhet ta përfundojë punën e nisur prej vitesh si për çështjen e Kosovës ashtu edhe për integrimin e Ballkanit Perëndimor.

Sipas tij, dy çështje urgjente janë: fillimi i negociatave për pranimin e Shqipërisë dhe Maqedonisë së Veriut në Bashkimin Evropian si dhe liberalizimi i vizave për Kosovën.

Ai tha se ka ardhur koha që Bashkimi Evropian të rikthejë besueshmërinë e zgjerimit dhe partnerët të bëjnë seriozisht punën e tyre në reforma.

“Kjo situatë nuk mund të vazhdojë më kështu”, – u shpreh Lajçak gjatë këtij samiti.

Në repliken e saj ministrja e Punëve të Jashtme e Kosovës, Donika Gërvalla, tha se “Bashkimi Evropian nuk duhet të presë një tjetër luftë në Ballkan për t’ hapur rrugë integrimit, siç bëri me Ukrainën me dhënien e statusit të kandidatit për pranim në BE vetëm pasi nisi pushtimi nga Rusia.

Ajo shtoi se tashmë shtetet e Ballkanit Perëndimor kanë dëshmuar se janë kontribuuese të jashtëzakonshme me vlera të përbashkëta në Bashkimin Evropian. Edhe ministri i Jashtëm i Kroacisë, Gordan Grliç Radman, i ka bërë thirrje edhe një herë Serbisë ta pranojë realitetin që Kosova është shtet i pavarur.

LEXONI GJITHASHTU:

• Lajçak: Duhet ta integrojmë Ballkanin Perëndimor në Bashkimin Evropian
• Lajçak: Jemi duke përgatitur një takim mes Vuçiçit dhe Kurtit në korrik