Transporti publik në protestë, kërkohet mbështetje financiare nga shteti

Edhe pse komiteti teknik i eksperteve vendosi heqjen e kufizimit për transportin publik, përfaqësues të linjave ndër qytetase janë të gatshëm të nisin këtë shërbim por protestojnë duke kërkuar mbështetje financiare.

Kryetari i shoqatës së transportit në Shkodër Gëzim Gjetja thotë se me protokollin e përcaktuar nga Ministria e Shëndetësisë, e kanë të pamundur të operojnë.

“TVSH, çmimi i biletës dhe pika më e madhe do të ishte heqje e mjeteve të pa licensuara”, tha Gëzim Gjetja, kryetar i shoqatës së transportit Shkodër .

Për këtë çështje u protestua edhe në Korçë. Kërkesat janë të njëjta.

“I kërkojmë qeverisë që të vazhdojë luftën ndaj konkurrencës së paligjshme. Kërkojmë ndihmë se thika na ka shkuar në palcë”, tha Shpëtim Vrioni.

Protesta të ngjashme u mbajtën edhe në disa qytete të tjera të vendit, ndërkohë pak ditë më parë, drejtuesit e shoqatave të transportit qytetase dhe ndërqytetëse protestuan përpara ministrisë së infrastrukturës duke adresuar të njëjtat kërkesa.