Vidhet gjatë natës kasaforta e Drejtorisë së Transportit Rrugor në Kashar, autorët morën një pjesë të vogël të xhiros

Gjatë mbrëmjes së djeshme autorë të paidentifikuar kanë vjedhur kasafortën e Drejtorisë së Transportit Rrugor në Kashar. Policia njoftoi se ka nisur hetimet, ndërsa në dyshimet paraprake mendohet se vjedhja është kryer me anë të thyerjes nga dy persona.

Sipas policisë, autoritetet janë njoftuar për ngjarjen rreth orës 07:45 të mëngjesit dhe po punon për zbardhjen e ngjarjes.

Euronews Albania kontaktoi drejtorin e Drejtorisë së Përgjithshme të Shërbimeve të Transportit Rrugor z. Blendi Gonxhja për të mësuar më shumë rreth incidentit.

Sipas z. Gonxhja autorët mendohet se kanë arritur të vjedhin vetëm një vlerë shumë të vogël të xhiros ditore të orës 15-16, e cila po verifikohet.

“Mendohet [vlera e vjedhur] të jetë diku tek jo më shumë se mbi 800 mijë lekë,” tha z. Gonxhja për Euronews Albania.

“Përgjegjëse për çdo gjë të kësaj natyre është shoqëria private që ruan objektin, çdo përgjegjësi do të dalë sot nga provat dhe çdo vlerë do t’i kthehet arkës nga personat përgjegjës për ruajtjen,” shtoi drejtori Blendi Gonxhja.

Më vonë gjatë së mërkurës, Drejtoria e Përgjithshme deklaroi zyrtarisht se shuma e grabitur ishte 706,148 lekë.